hér er hægt skrá sig og hlaupa í Reykjavíkurmaraþoninu 2010 og styrkja Sóley og félagar.

SÖFNUNARÁTAK HELGINA 26-27 JÚNÍ.

Heimsmeistarakeppnin í fótbolta fer nú fram í Afríku í fyrsta skipti. Það á vel við. Hvarvetna í Afríku má sjá fólk í fótbolta. Völlurinn getur verið sandur eða leir, markið tré eða steinar og boltinn stagbætt gúmmítuðra eða þéttvafinn taubolti. Til að hafa gaman af leiknum þarf aðeins áhuga, andstæðing, tuðru og samkomulag um hvar markið á að vera.

Sóley & félagar standa fyrir sölu á 10.000 tauboltum helgina 26-27 júní. Þá munu börn á vegum íþróttafélaga bjóða tauboltana til sölu. Fram að því hafa ýmsir tekið þátt í boltaframleiðslunni, saumklúbbar um allt land, vistmenn á Hrafnistu og listasmiðjan á Laufásborg svo eitthvað sé nefnt.

Tauboltinn kostar 1.500 kr og framlagið rennur til byggingar nýs heimilis fyrir um 100 börn. Vertu með okkur í þessu átaki og taktu vel á móti sölumönnunum með tauboltana helgina 26-27 júní.

Allir sem komu í Hagaskóla miðvikudaginn 24. mars síðastliðinn hljóta að hafa fyllst bjartsýni og gleði. Krakkarnir höfðu umbreytt skólanum i flóamarkað, sirkús og hjólaverkstæði; snyrtistofu, kaffihús og tónleikasal. Skólinn iðaði af uppátækjasemi, hæfileikum og lífskrafti.

En tilefni krakkana var ekki einvörðungu að skemmta sér og öðrum heldur að gera gagn. Dagurinn bar yfirskriftina Gott mál og andvirði alls erfiðis krakkanna var látið renna til góðgerða og helmingurinn kom í hlut Sóley & félagar. Og það var upphæð sem aldeilis munar um, 508 þúsund krónur sem munu renna í byggingasjóðinn.

Það var gefandi að fylgjast með krökkunum í Hagaskóla þennan dag. Það var eins og þeim væru allir vegir færir og væru þakklát fyrir það, nógu þakklát til að rétta þeim hjálparhönd sem ekki eru eins gæfusöm. Það eitt að njóta samvista við slíkt fólk læknar mann af öllum raunum.

Um leið og Sóley & félagar þakka kærlega fyrir sig óskum við krökkunum í Hagaskóla, kennurum þeirra og foreldrum til hamingju með glæsilegan dag. Vonandi verður þetta árlegur viðburður næstu ár og aldir.

Nýjustu fréttir frá Togo eru m.a. þær að Victo lét byggja ofn við heimilið og nú eru hún og fólkið á heimilinu á fullu við að baka brauð til að selja og gengur vel. Ofninn lét hún byggja fyrir peninga frá Sóley og félögum. Þetta er gott dæmi um hvað hún leggur mikla áherslu á sjálfbærni og að kenna skjólstæðingum sínum að skapa og bjarga sér.

Öskupokagleðin heppnaðist einstaklega vel. Tæplega 100 konur mættu í Lækjargötu 2 og saumuðu af kappi í einn og hálfan tíma. Tóta, Tína og Ditta voru á saumavélunum og renndu pokunum í gegn. Pokarnir eru einstakir og hver með sínu sniði og bera höfundi sínum fagurt vitni. Sumir bera steina og aðrir ösku og enn aðrir málshætti eða annars bara tómir. Tóta (Þórunn Sveinsdóttir) dró upp úr pússi sínu beygjanlega títuprjóna sem hún hefur geymt einsog fjársjóð í gegnum súrt og sætt. Við góðar undirtektir las Bragi Ólafsson kafla úr bók sinnni sem kemur út í haust og Árni Björnsson fræddi viðstadda um öskudagshefðina. Saumvélarnar neyddust til þess að þagna á meðan, sem þær gerðu með seming, en það má með sanni segja að kappssemin hafi ríkt í salnum. Eftir undurfagran söng Ingveldar Ýr fengu konurnar að borða enda orðnar sársvangar eftir vinnutörnina. Kreppufæðið gerði mikla lukku en það er allt Þóri Bergssyni kokki og Ástu Ingibjartsdóttur skurðarmeistara að þakka.  Þeim til aðstoðar voru þeir Snær og Gunnar Smári. Það verður líka að þakka sérstaklega bestu fiskbúð borgarinnar HAFBERG, Sævari í BÚR sem gaf allt grænmetið, Ara í YGGDRASIL  sem gaf hrásykurinn og eggin sem voru notuð í Marensskýið að hætti Áslaugar Snorra en það var borið fram í lok kvöldsins og aðdáun viðstaddra leyndist ekki. Saumadísirnar sem mættu til vinnu eiga allar skilið miklar þakkir. Uppskera kvöldsins eru 550 pokar sem verða til sölu í bókabúðinni Iðu, Kaffifélaginu, Yggdrasil, 12 tónum, Lítil í Upphafi og öðrum góðum búðum á Skólavörðustígnum.  Pokinn mun kosta 400 kr. sem renna óskertar í byggingarsjóð Sóley og félaga. Takk, takk, takk.

16. jan – 13. feb laugardaga kl. 13.30 (60 mín)

Allur ágóði rennur óskiptur til Sóley og félagar

. Samverustund fyrir alla fjölskylduna. Börnin eru frábærir kennarar og við njótum nærveru þeirra í fjölskylduyoga. Unnið  með  yogastöður (asana), öndun (pranayama), hugleiðslu, slökun, söng og dans og skapandi samveru. Kennari Ásta Arnardóttir en hún hefur áralanga reynslu af skapandi starfi með börnum í leiksmiðjum og listsmiðjum sem og gönguferðum úti í náttúruna. Kennt er í Lótus jógasetri, Borgartúni 20. 

Allir hjartanlega velkomnir 

www.this.is/asta